Serhio Aguero (Sergio), napadač Mančester sitija, najbolje je ostavio za kraj. Oborio je rekord po broju golova za jedan tim u Premijer ligi.

Argentinac, koji će nakon 10 godina na "Etihadu" ovog ljeta napustiti redove novog prvaka Engleske, postigao je dva gola na meču 38. kola s Evertonom (5:0).

Aguero je na teren ušao u 65. minuti, a šest minuta kasnije je postigao prvi, a u 76. minuti i svoj drugi gol na utakmici.

Time je sa 184 gola za "Građane", ostavio iza sebe Vejna Runija (Wayne Rooney), koji je držao rekord kao igrač Mančester junajteda sa 183 pogotka.

Aguero je kada se sve sabere u svim takmičenjima na 389 mečeva postigao 260 golova za Siti.

Zaista impresivan skor, malo je napadača koji se mogu pohvaliti takvim učinkom u jednoj tako jakoj ligi.

Na kraju meča bilo je veoma emotivno. Na stadionu su navijači transparentima i zastavama s likom Aguera pozdravili Argentinca koji će 29. maja u finalu Lige prvaka posljednji put nastupiti u dresu Sitija.